savacon@gh.gl
kalaallisut..English
 


 

 

 

 

 
 

Misileraavik Upernaviarsuk

Misileraavik Upernaviarsuk tassaavoq Namminersorluni Oqartussat misileraaviat, Kalaallit Nunaanni nunalerinermik inuussutissarsiuteqartunut atuarfiutigisoq. Qaqortumiit kangimut 7 km. missaani inissisimavoq, assartuinerlu tamarmi umiatsiamik pisarluni. Kangerluup silasissuaniippoq, ukiup affaani sikuneq ajortumiilluni, upernalerneranili sikorsuaqangaatsiarsinnaalluni.

Upernaviarsummi nunalerinermi misileraanerit aamma nunalerinermik ilinniartitaanerit ingerlanneqartarput. Suliassaasut sorpassuusinnaasarput, annertunerusumilli uumasuutinik kinguaassiortitsinissami savaateqarnermut aningaasarsiornikkut pingaaruteqaqisumi suliassat aallunneqartarlutik. Tassunga atatillugu savanik kinguaassiortitsinissami aaqqissuussamik ineriartortitsinissaq sulissutigineqarpoq, uanilu islandimiut savanik kinguaasiortitseriaasiat "Fjarvis" atorlugu kiisalu savanik nerlersueriaatsinik misileraanerit ingerlanneqarlutik.

Aamma misileraavimmi ikikkaluanik nersussuarnik- hiistinillu peqarpoq, ilinniartitsinissaq pinerullugu. Nersussuarnit immuliorfeeraliorniarnerigaluaq qaquunersumut kinguartikkallarneqarpoq, aningaasaliissutissat amigaataasimanerat pissutigalugu.

Naatitalerinerup iluani ivigassanik assigiinngitsunik ukiut arlerlugit atasinnaasunik aamma nerukkaatissiornissami misileraasoqartarpoq, kiisalu allat ukioq ataaseq atasartunik soorlu karrinik, iffiassanik, byg aamma havre aammalu qungulernik (kål) misileraasoqartarpoq. Taakkua saniatigut aamma nalinginnaasumik naatitanik naatsiivimmilu naatinneqarsinnaasanik misileraaviup misileraaviini naatitanillu atuaarfimmi misileraasoqartarpoq; sikkersussat, orpikkat orpiillu nammineq atugassat illoqarfinnilu ikkussugassat ilanngullugit.

Upernaviarsummi nunalerinermik atuarfeqarpoq annikitsumik, 16-nik ilinniartulik (ukiakkut 2008), ilinniartut 3-7 atuarfimmiittarlutik sinnerilu uumasuuteqarfinni Kalaallit Nunaanni kiisalu Island aamma Norge-mi sungiusariartinneqartarlutik. Upernaviarsummi inuit sisamat sulisorineqarput, nunalerinermik ilinniartitsisoq/nakkutilliisoq, ingerlatsinermi pisortaq, igasoq kiisalu gartneri.

Upernaviarsummi nunalerinermik atuarfik
Postboks 152
3920 Qaqortoq
Oqar.: +299 64 93 06 / +299 64 93 03 + lokal nummer

Atuarfimmut ingerlatsisuuvoq Inuili
Oqar.: +299 66 13 13
E-mail: inuili@inuili.gl